Muhabbat jurm sarzad ho gaya mujh sey saza likh do
Shareek e jurm lekin kis tarah sey bach gaya likh do
Mujhay is teergi mein kuch sujhaayee hi nahi deyta
Tum in palkon pay koi timtimata sa diya likh do
Zuban ko izn e junbash hi nahi,rokoon tumhein kaisay?
meri aankhon mein koi bheegti si ilteja likh do
Nasab e dil mein tum ney yun tou sab kuch likh dia lekin
Jigar sey roshnayee lay k ab is mein wafa likh do
Tumhari aankh mein apna muqadar parh lya mein ney
Issay mayri jabeen par bhi, tum aa kar ab zara likh do
Yeh phailay tou zameen o aasmaan ki wus'atein kum hain
Samaito ayk nuktay mein tou dil ko KARBALA likh do
Khuda bhi rad karay tou ayk lamhay kay lye sochay
Batool,apnay labon par tum,koi aysi dua likh do
